ಕೊರೊನಾ ಎರಡನೇ ಅಲೆ ನಡುವೆ ರಾಜ್ಯದಲ್ಲಿ 35 ಬ್ಲಾಕ್ ಫಂಗಸ್ ಪ್ರಕರಣಗಳು ಪತ್ತೆ! | ಜನತಾ ನ್ಯೂಸ್
ಬೆಂಗಳೂರು : ಕೊರೊನಾ ವೈರಸ್ ಸೋಂಕಿನಿಂದ ತತ್ತರಿಸಿರುವ ಕರ್ನಾಟಕಕ್ಕೆ ಮತ್ತೊಂದು ಬಿಗ್ ಶಾಕ್ ಎದುರಾಗಿದ್ದು, ಕೊರೊನಾದಿಂದ ಗುಣಮುಖರಾದ ರೋಗಿಗಳಲ್ಲಿ ಇದೀಗ ಬ್ಲಾಕ್ ಫಂಗಸ್ ಪತ್ತೆಯಾಗುತ್ತಿದೆ ಎನ್ನಲಾಗಿದೆ.
ಇಂದು ಟ್ವೀಟ್ ಮಾಡಿರುವ ಅಶ್ವತ್ಥ್ ನಾರಾಯಣ್ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಪರಿಸರದಲ್ಲಿರುವ ರೋಗಕಾರಕಗಳ ವಿರುದ್ಧ ಹೋರಾಡುವ ದೇಹದ ಸಾಮರ್ಥ್ಯವನ್ನ ಕ್ಷೀಣಿಸುವಂಥ ಔಷಧಗಳನ್ನ ತೆಗೆದುಕೊಳ್ಳುತ್ತಿರುವವರ ಮೇಲೆ, ಮ್ಯೂಕೋರ್ಮೈಕೋಸಿಸ್/ಕಪ್ಪು ಫಂಗಸ್ ಇನ್ಫೆಕ್ಷನ್ ಪರಿಣಾಮ ಬೀರುತ್ತದೆ. ಹೀಗಾಗಿ ರೋಗಲಕ್ಷಣ ಕಾಣಿಸಿಕೊಂಡ ಆರಂಭದ ಹಂತದಲ್ಲೇ ಮುನ್ನೆಚ್ಚರಿಕೆ ವಹಿಸಿ ಎಂದು ಹೇಳಿದ್ಧಾರೆ.
ಸದ್ಯ ಸೂರತ್ ನಲ್ಲಿ 40 ಹಾಗೂ ಕರ್ನಾಟಕದಲ್ಲೂ 35 ಬ್ಲಾಕ್ ಫಂಗಸ್ ಪ್ರಕರಣಗಳು ಕಂಡುಬಂದಿವೆ ಎನ್ನಲಾಗಿದ್ದು, ಈ ಸಮಸ್ಯೆಯಿಂದ ರೋಗಿಗಳು ದೃಷ್ಟಿ ಕಳೆದುಕೊಳ್ಳಲು ಕಾರಣವಾಗಬಹುದು ಎನ್ನಲಾಗಿದ್ದು, ಬ್ರೇನ್ ಡ್ಯಾಮೇಜ್ ಆಗುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.
ಮ್ಯೂಕೋರ್ಮೈಕೋಸಿಸ್ ಅಂದ್ರೇನು?
ಯುಎಸ್ ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್ ಆಯಂಡ್ ಪ್ರಿವೆನ್ಷನ್ (CDC) ಪ್ರಕಾರ, ಮ್ಯೂಕೋರ್ಮೈಕೋಸಿಸ್ ಅಥವಾ ಕಪ್ಪು ಫಂಗಸ್ ಒಂದು ಅಪರೂಪದ ಫಂಗಲ್ ಇನ್ಫೆಕ್ಷನ್. ಹಿಂದೆ ಇದಕ್ಕೆ ಝೈಗೋಮೈಕೋಸಿಸ್ ಎಂದು ಕರೆಯಲಾಗುತ್ತಿತ್ತು. ಮ್ಯೂಕೋರ್ಮೈಸೆಟ್ಸ್ ಎಂಬ ಶಿಲೀಂಧ್ರ(ಫಂಗಸ್) ನಿಂದ ಉಂಟಾಗುವ ಗಂಭೀರ ಸೋಂಕು ಇದಾಗಿದೆ.
ಈ ಫಂಗಸ್ ಸುತ್ತಮುತ್ತಲ ಪರಿಸರದಲ್ಲಿ ಇರುತ್ತದೆ. ವ್ಯಕ್ತಿ ಉಸಿರಾಡುವಾಗ ಗಾಳಿಯಿಂದ ಈ ಫಂಗಲ್ ಸ್ಪೋರ್ಗಳನ್ನ ಒಳಗೆಳೆದುಕೊಂಡ ನಂತರ ಅದು ಸೈನಸ್ ಅಥವಾ ಶ್ವಾಸಕೋಶದ ಮೇಲೆ ಪರಿಣಾಮ ಬೀರುತ್ತದೆ. ಹಾಗೇ ಚರ್ಮದ ಮೇಲೆ ಕುಯ್ದ ಗಾಯ, ಸುಟ್ಟ ಗಾಯ ಅಥವಾ ಇನ್ನಿತರೆ ಯಾವುದೇ ರೀತಿಯ ಗಾಯವಾದಾಗ ಈ ಫಂಗಸ್ ಬರಬಹುದು.
ತಲೆನೋವು, ಕಣ್ಣಿನ ಸುತ್ತ ನೋವು, ಕಣ್ಣೀರು, ಮುಖದಲ್ಲಿ ನೋವು ಕಾಣಿಸಿಕೊಳ್ಳುವುದು ಬ್ಲಾಕ್ ಫಂಗಸ್ ಲಕ್ಷಣಗಳಾಗಿದ್ದು, ಈ ಲಕ್ಷಣಗಳ ಆಧಾರದ ಮೇಲೆ ENT ಅಥವಾ ನ್ಯೂರೋ ವೈದ್ಯರನ್ನ ಭೇಟಿ ಆಗಬೇಕು. ಯಾವುದೇ ಕಾರಣಕ್ಕೂ ನಿರ್ಲಕ್ಷ್ಯತನ ಒಳ್ಳೆಯದಲ್ಲ ಎಂದು ವೈದ್ಯರು ಹೇಳುತ್ತಾರೆ.